2019-10-09
İsveçrənin irimiqyaslı investisiya forumunda aparıcı İsveçrə şirkətləri Azərbaycana sərmayə yatırmağa çağırıldı

İsveçrənin Sürix şəhərində Azərbaycan səfirliyi ilə əməkdaşlıqda İsveçrə-MDB Birgə Palatası tərəfindən “Yeni İpək Yolu” investisiya forumu təşkil edilmişdir. İsveçrədə “Kəmər və Yol Təşəbbüsü”nə həsr edilən əsas irimiqyaslı forumda Azərbaycan Səfirliyi İsveçrə sərmayəsinin ölkəmizə cəlb edilməsi məqsədilə nüfuzlu sərmayədarlar və tanınmış biznes dairələrini təmsil edən 100-dən artıq iştirakçı ilə fikir mübadiləsi və müzakirələr aparmışdır.

Azərbaycanın İsveçrədəki səfiri Xanım İbrahimova tədbir çərçivəsində təqdimatla çıxış etmiş və təqdimatında Avropa və Asiya arasında strateji mövqedə yerləşən Azərbaycanın “Kəmər və Yol Təşəbbüsü”nü dəstəklədiyini vurğulayaraq, bu dəstəyi şərtləndirən amilləri sadalamış və bu məqsədlə 2015-ci ildə Azərbaycan Respublikasının Prezidenti cənab İlham Əliyevin Çinə dövlət səfəri çərçivəsində imzalanmış sazişə diqqət çəkmişdir.

Azərbaycan səfiri ölkəmizin həyata keçirdiyi regional layihələr, o cümlədən Bakı-Tbilisi-Ceyhan neft və Bakı-Tbilisi-Ərzurum qaz kəmərləri, Cənubi Qaz Dəhlizi barədə danışmış, Azərbaycanın təşviq etdiyi Şərq-Qərb, Şimal-Cənub və Cənub-Qərb nəqliyyat dəhlizləri barədə açıqlama vermişdir. Qeyd edilmişdir ki, ölkəmiz bu nəqliyyat dəhlizlərinin qovşağında mərkəz rolunu oynamaq üçün bütün lazımi infrastruktura malikdir. Bu kontekstdə Bakı-Tbilisi-Qars dəmir yolu xətti, Ələt Beynəlxalq Dəniz Ticarət Limanı, yeni salınmış avtomobil yolları və hava limanları barədə müzakirələr aparılmışdır. Eyni zamanda Ələt limanının Xəzər regionunda Yaşıl Limana çevrilmək öhdəliyi götürən ilk liman olduğu vurğulanmışdır. Bütün bu layihələrin sayəsində Azərbaycanın Asiya ilə Avropa arasındakı ticarətdə ən qısa məsafəni təmin etmək iqtidarında olduğu bildirilmişdir. X.İbrahimova, həmçinin yuxarıda qeyd edilən bütün nəqliyyat layihələrinin Prezident İlham Əliyevin rəhbərliyi altında həyata keçirilən islahatlar sayəsində mümkün olduğunu qeyd etmiş, ölkəmizə daha çox xarici investisiyaların cəlb edilməsi istiqamətində iqtisadi tədbirlərin davam etdirildiyini söyləmişdir. Daha sonra Səfirliyin müşaviri Arif Məmmədov Azərbaycanın Avrasiyada logistika mərkəzi rolunu oynamaq imkanları barədə təqdimatla çıxış etmişdir.

Tədbirin sonunda İsveçrənin ATƏT Parlament Assambleyasındakı nümayəndə heyətinin prezidenti Margareta Kiner Nellen “Kəmər və Yol” layihəsini İsveçrə Parlamenti prizmasından dəyərləndirmişdir.

növbəti xəbər əvvəlki xəbər