“Trio Areal” üçlüyünün konserti təşkil edilmişdir.
2025-ci il sentyabrın 21-də Cenevrə şəhərində “Heritage” (İrs) Azərbaycanın Mədəni İrsi Assosiasiyasının dəstəyi ilə Azərbaycanlı skripkaçı Cəmilə Qarayusiflinin başçılıq etdiyi və isveçrəli musiqiçilərdən ibarət “Trio Areal” üçlüyünün konserti təşkil edilmişdir.
“Heritage” (İrs) Azərbaycanın Mədəni İrsi Assosiasiyasın uzun illərdir ki, Avropada Azərbaycanın tarixi və mədəniyyətinin tanıdılması istiqamətində fəal fəaliyyət göstərir. Assosiasiyanın missiyası Azərbaycan ənənələrinin, incəsənətinin və musiqisinin zənginliyini Avropa auditoriyasına təqdim etməkdir. Belə konsertlərin və təqdimatlarının dəstəklənməsi ilə assosiasiya mədəniyyətlərarası dialoqun inkişafına töhfə verir və Azərbaycanın mədəni irsini gələcək nəsillər üçün qoruyur.
Konsert çərçivəsində Trio Areal öz debüt albomunu təqdim etmişdir. Albomda Tofiq Bakıxanov, Frank Martin və Dmitri Şostakoviçin əsərləri yer almaqdadır. Albomun önəmli tərkibi Bakıxanovun Üçüncü Fortepiano Trio əsərinin premyerasıdır. Bu əsər Azərbaycan xalq musiqisindən ilhamlanmışdır.
Konsert zamanı trionun müxtəlif musiqi ənənələrini birləşdirmək bacarığı xüsusi vurğulanmışdır — kelt melodiyalarından və Şostakoviçin müharibə elegiyasından tutmuş Bakıxanovun Azərbaycan muğam ritmlərini Qərb klassik musiqi formaları ilə sintez etməsinə qədər.
2020-ci ildə Sürixdə təsis edilən Trio Areal maraqlı proqram seçimləri və canlı ifa üslubu ilə qısa müddətdə tanınmışdır. Cenevrə konsertində dinləyicilər XX əsrin üç əsas mövzusu ilə tanış oldular: yeni ifadə formalarının axtarışı, tarixi hadisələrin dramı və milli mədəniyyətlərin qovuşması.
Trio Areal-ın debüt albomu nəinki onların sənətkarlığını təsdiq edir, eləcə də klassik musiqi ilə mədəni kimlik arasındakı möhkəm bağları vurğulayır.
